آغزین آچیب عدالتدن دم وورور
اماملارین سایین بیلمیر نئچه دی
علی دن دانیشیر حقدن دم وورور
بیری وار دوغرونی یالانی بیلمیر
یاخچی نی تانیمیر یامانی بیلمیر
آبروسین ساتیبدی حیانی بیلمیر
ناموس دن غیرتدن عاردن دم وورور
بیری ده نمازین دوزونه قیلمیر
هئچ کیمین گوزونون یاشینی سیلمیر
دنیاسین بزه ییر آخرت بیلمیر
ساققال قویوب دین ایماندن دم وورور
آیاق یالین اللی ائلی دولانیر
غنچه دهن ساری تئلی دولانیر
قاشی کمان اینجه بئلی دولانیر
پیغمبر دن شریعتدن دم وورور
بیری تکجه ظاهرین تمیزله دیر
اوز عالمیندن اوزون عزیز له دیر
سفره سین آچماییر چوره ک گیزله دیر
آمما گلیب دوزچوره کدن دم وورور
بیری ده وار اوزو قالیب ایشینه
باغلامالیدیر اوکوزون هئشینه
اصلا بیلمیر آرواد نه دی کیشی نه
کیشیلیقدن دئییر اردن دم وورور
بیری جهانبخش تک ائلچین چالیشار
ائلینین غمینده یانیب آلیشار
یئری گلسه آغزین آچیب دانیشار
دم ده وورسا اوز ائلیندن دم وورور
موضوعات مرتبط: شعرهای شاعران هزاررودی
تاريخ : ۱۳۹۱/۱۰/۱۸ | | نویسنده : سلمان ولیمحمدی |