هلــــه جوانلیقی قورتارمامیشام
گورورام طوفان تک گلیر قوجالیق
یخیلمیشم یالـــــواریرم دایانسین
نه دیل بیلیر نه آند بیلیر قوجالیق
دییردیم هلـــــــــــه دا اوجالاجاقام
اوجـــــــــــالیب فلکدن باج آلاجاقام
نه بیله یدیم بوگون تئز قوجالاجاقام
ایلان تک گیزلیندن چالیر قوجالیق
دنیانین بنزری آرخداکـــی سودور
هرچیخان گونوموز صاباحی گودور
هرگلن گیده جاق قایداسی بودور
سن دیمه منیملن قالیر قوجالیق
نه یاتـــــــــا بیلیرم نه دا اویاغام
نه ده کـــی اوتوروب نه دا آیاغام
نه ده کی بیر کسه ایندی دایاغام
گور نه ویریب نه لر آلیر قوجالیق؟!
ویردیغی نه پایدی دیزیمی آلیر؟
دیلیمدن چنگه لیر سوزومی آلیر
آغلادا آغلادا گــــــــــوزومی آلیر
اوتورور قارشیمدا گولیر قوجالیق
اوولجه تنگیدیر بـــو اوره کیمی
سالیر قدرتیندن نــر بیله کیمی
باشدان خیالیمی هردیله کیمی
محوائدیر قوجالیق سیلیر قوجالیق
نیجه کــوکسون خنجریله یارام من؟
قوجالیقین قــــانین ائدیم حارام من
بیرشعمیله چوختاندی کی یارام من
ایندی باخــا باخـا پولیر قوجالیق
آلنیمه چین سالدی بئلیمه کامان
ایچیمـــــدن آلیشیب یانیرم یامان
منــــی اشاره یله چاغیران زامان
اوتانیرم !هیــچ اوتانمیر قوجالیق!
بیر شور دا سالاردیم سسیمله باغا
بیرآندا گئدردیـــــــم داغ اوسته داغا
یتیشان کیم اییدی بیــر جوت آیاغا؟؟
ایندی آیاغیمی باغلیر قوجالیق
کیم ترپاتــــدی دام ایشلایان داشیمی؟
کیم گوستردی گوزوم اوسته قاشیمی؟
بیلمیرم یاستوقـــــــــده نیجه باشیمی
آستاجا آستاجا سالیر قوجالیق
نه قادین تانییار نـــــه دا کی کیشی
نامــــــرد قوجالیقین بیله دی ایشی
گوره نمی هر گونده صدفلی دیشی
مندن آلیب کیمه ویریر قوجالیق؟
قوجالیق گوروم کی سن قوجاله سن
ائده ســـــــن منیم تک فغان ناله سن
"اونودمازین"بیــــرآهیلــــه یانـــه سن
بیرگون دئسه لر کی اولیر قوجالیق.
موضوعات مرتبط: شعرهای شاعران هزاررودی
تاريخ : ۱۳۹۱/۱۲/۰۴ | | نویسنده : سلمان ولیمحمدی |